El domo de Verona, del cuało el nome ufisiałe el ze catedrałe de Santa Maria Asunta ma conosesto anca cofà catedrałe de Santa Maria Matricułare, dal nome de l'antiga ceza paleocristiana, el ze el prinsipale liogo de culto catòłego de ła sità de Verona, ceza mare de l'omònema diòseze. El fa parte de on compleso architetònego del cuało ghe fa parte anca el pałaso del Vescovado, el ciostro dei Canòneghi, ła biblioteca capitołare, el batistero de San Joani in Fonte e ła ceza de Sant'Elena, sti ùltemi do i ze ligai al domo col portegà de Santa Maria Matriculare.